LAOAG CITY – Inlawlawag ni Mr. Rommel Pascua, faculty member ti Mariano Marcos State University – College of Aquatic Sciences and Technology (CASAT) ti Coastal Resources Management.
Segun ken ni Pascua, daytoy ti wagas iti pannakatagiben dagiti marine species ken daduma pay a marine organisms amin a nasken a mataripato iti uneg ti kabaybayan.
Inbatad na a ditoy probinsya ket addan ti naiyuswat a coral transplantation iti kabaybayan iti ili ti Pagudpud tapno maisalbar dagiti nadadael a coral reefs.
Kuna na a karaman ditoy ti nagduduma nga aktibidad nga adda ti pannakainaig na iti panangtagiben ti coral reef ken information education campaign kadagiti coastal areas ditoy probinsya.
Immunan nga inpakaammo ni Pascua a ti pagilian ti sentro ti aquatic biodiversity wenno addaan ti kalaawan a kabaybayan iti intero a lubong.
Inbatad na nga agarup 70% ti marine species a maduktalan ditoy pagilian, ti kangatoan a posyente iti intero a lubong.
Nu pay kasta, kuna na nga addan ti naduktalan a coral bleaching, maysa nga indikasyon nga in-inot ti pannakaperdi ti pagnanaedan ti marine organisms wenno dagiti coral reefs.
Inbunannag na a nu madadael dagitoy ket dakkel a pilay iti marine biodiversity ti paglian ken makaapektar iti food sustainability saan laeng ditoy pilipinas ngem iti intero a lubong.
Gapu iti daytoy, inpetteng na a nasken nga adda ti maaramid nga addang tapno maisalbar dagiti coral reef.
