LAOAG CITY – Inpakaammo ni Bombo International News Correspondent Ray Ortal Villanueva iti Los Angeles, California, a naipaima iti kongresso ti 2.2 a trilyon a dolyar a Coronavirus Stimulus Act kalpasan a naaprobaran ti senado.
Nadiskutir dagiti sumagmamano nga ammendments kas iti panakaipaay ti 1,200 a dolyar iti kada tax payer ken ti 500 a bilyon a pisos para kadagiti dadakkel a kompanya.
Sakbay a pirmaan ni Presidente Donald Trump ti gakat, kuna ni Villanueva a ti panagsarita ni House Speaker Nancy Pelosi, nakurang ti 1,200 a dolyar a maited iti kada tax payer gapu ti nakaro nga epekto ti COVID-19 ngem ketdi 600 a dolyar iti kada lawas iti uneg ti uppat a bulan ti maited kadagiti umili kas paset ti programa ti gobyerno nga unemployment inssurance.
Inbatad ni Villanueva a posible nga agproblema ti gobyerno no bilang maibus dagiti kompanya ti 500 a bilyon a dolyar gapu ta adu dagiti nagipila ti unemployment benefit.
Inpakaammo na nga umaboten ti 3.3 a milyon nga Americans ti nagpila iti unemployment benefits.
Inbinsa-binsa ni Villanueva ti pakaigastuan ti 2.2 trillion dollars a coronavirus stimulus, 500 a bilyon a dolyar para kadagiti dadakkel a kompanya, 350 a bilyon a dolyar para kadagiti babassit a kompanya, 260 a bilyon a dolyar para iti emergency unemployment insurance, 150 bilyon a dolyar para iti health care, 150 a bilyon a dolyar para kadagiti lokal a gobyerno ken ti 85 a bilyon a dolyar wenno 1,200 a dolyar iti kada tax payers.
Kabayatanna, inpakaammo ni Villanueva nga umaboten ti 1,200 ti kaso ti COVID-19 iti California ken 10 dagiti pimmusay gapu ti nasao a virus.
