LAOAG CITY – Balligi ti pannakaisayangkat iti counter-landing exercise ti Armed Forces of the Philippines ken United States Armed Forces kas paset ti Balikatan Exercises 2024 a naiwayat iti Brgy. Lapaz Sand Dunes ditoy siudad ti Laoag.
Segun ken ni Col. Francel Margareth Padilla, ti pannakangiwat ti Armed of the Philippines, nangideployda kadagiti high-powered military assets kas ti utmost 155 millimeters high powered howitzer, 105 howitzer army artillery regiment, 2 marine core 105 millimeters howitzer idinto nga iti United States Armed Forces ket nangideployda ti 2 howitzer, 5.56 caliber rifles, medium and heavy guns, 3 javelin anti-tank missiles ken 3 a MAAWS weapon system.
Inbatadna a babaen iti daytoy ket mangipakita ti kabaelan dagiti dua puersa a lappedan iti aniaman a pangta ti seguridad ditoy pagilian.
Inlawlawagna a karaman iti nasao a counter-landing exercise ket ti Philippine Army, 502nd Infantry Brigade, Philippine Army Corps 4th Marine Brigade, United States Army 3-7 Field Artillery, United States Marine Corps 3rd Combat Team ken Maritime Defense Tactics.
Kunana nga awan dagiti kameng ti Army a nakapasar iti aniaman nga heat related illnesses kabayatan iti nasao a exercise no sadino a dumanon iti rinibu ti nakipaset.
Mainaig iti daytoy, inpakaammo ni Col. Padilla a manarimaanen ti panagsagsaganada iti maisayangkat a maritime strike inton bigat, Mayo 8 no sadino a daytoy ket pakipagpasetan manen ti Armed Forces of the Philippines ken United States Armed Forces iti sinking exercises nga usarenda iti BRP Caliraya AF-81 a naaramid manipod iti China.
Inpaganetgetna a ti balikatan exercise ket saan a mangipasimudaag iti panagsagsagana kontra iti China.
Kunana a daytoyen ti maika-39 a balikatan exercise a naiwayat ditoy pagilian no sadino a tunggal tawen ket adda dagiti nagduduma a scenario kas maibasar iti contemporary security challenges ti pagilian.
Inpettengna a ti target-da iti nasao nga aktibidad ket maaddaan ti napigsa nga estratehia ken kabaelan a matagiben ti seguridad iti pagilian iti aniaman a pangta ti seguridad a mapasamak.
Kunana nga inton bigat ket adda ti maysa a barko a maikabil iti 8.5 nautical miles manipod iti Brgy. Lapaz Sand Dunes wenno katukad ti 15,000 kilometers.
Nupay kasta, inlawlawagna nga uray daytoy ket naawagan laeng a sinking exercise ket kalikagumda a saan a maarinebneb ti barko.
