LAOAG CITY – Kinumpirmaran ni Engr. Romeo Bartolome, construction division chief iti DPWH 1st engineering district ti panangibilin da iti lokal a gobyerno iti ili ti Bangui a counterpart da iti pananggabur ti proyekto ti Department of Agriculture a farm-to-market road.
Inlawlawag na nga inpakaammo ti gobyerno lokal a malmalayus ti nasao a kalsada rason nga inbaon na ti project engineer iti lugar ket nakumpirmaran na nababa daytoy.
Inbatad ni Bartolome a mangala da kuma ti pondo manipud iti nailatang a pondo para ti semento rason nga inkiddaw da iti LGU nga isuda iti manggabur.
Mainaig iti daytoy, inpakaammo ni Bartolome nga adda ti naituding nga aldaw a pannakaileppas ti maysa a proyekto ket saan a dakes para kenkuana a maubra ti proyekto iti holiday wenno Domingo ken ti nasken ket awan ti problema iti pannakaileppas ti proyekto.
Innayon na nga iyal-alisto ti kontraktor nga ileppas ti proyekto.
Naamuan nga umabot ti 10 a milyon a pisos ti pondo ti proyekto ken agatiddog ti 880 a metro daytoy.
