LAOAG CITY – Kinumpirmaran ni Mayor Fidel Cimatu iti ili ti Bangui a manarimaan iti pannakatarimaan dagiti heavy equipment ti gobyerno lokal rason a nang-hire da kadagiti heavy equipment iti maysa a pribado a kompanya tapno agquarry.
Daytoy ket kalpasan a timmaod ti problema kalpasan a nakumpiskar ken naipakustudyar dagiti tallo a dumptruck ken maysa a backhoe a kukua ti agnagan ti Larry Sunga iti CENRO Bangui kalpasan a nagreklamo ni Sangguniang Bayan Member Joey Soriano.
Maipalagip nga immuna a naamuan ti konsehal a maar-aramat dagiti ma-quarry iti proyekto ti lokal a gobyerno ngem naduktalan na a maar-aramat a pagbunbon iti proyekto ti Department of Agriculture nga ipatpatungpal ti Department of Public Works and Highways.
Inlawlawag ni Mayor Cimatu a nakurang iti naiprograma a proyekto ti DA rason nga agnayun ti DPWH ti pagbunbon ngem awan ti makaanay a pondo.
Gapu iti daytoy ket inbaga ti departamento a counterpart ti munisipyo iti nayun a pannakagabur ti proyekto a farm-to-market road manipud ti banban river.
Inpetteng ni Cimatu a saan pay a nalpas ti nasao a proyekto ngem ketdi iyal-alisto da gapu ta agleppas ti kontrata ita a bulan ti Disyembre.
Inlawlawag ni Mayor Fidel Cimatu iti ili ti Bangui a nagrenew da ti gratuitous permit ti gobyerno.
Kuna na a kalpasan ti nasao nga insidente ti panagquarry ket nagpalawag kenni Gov. Matthew Marcos Manotoc a nasken a malpas da ti proyekto ken nagpakada a makaala da ti quarry iti banban river.
Segun kenni Cimatu, adda ti verbal a pammilin ti gobernador mainaig iti pannakakutkot dagiti karayan ken maysa ti karayan da a makutkutan.
Mainaig iti daytoy, nagsungbat metten ti mayor iti naipatulod a reklamo iti hot line 8888 ni Presidente Rodrigo Duterte.
Kamaudian na, kinumpirmaran ni Ms. Alma Alaba, book keeper ken chief financial officer ni Mr. Larry Sunga nga akin kukua kadagti heavy equipment iti panangipausar na kadagitoy iti munisipyo iti ili ti Bangui.
Daytoy ket para iti maiyal-alisto a proyekto ti DA nga inpatpatungpal ti DPWH ken iti counterpart ti lokal a gobyerno.
Segun kenni Alaba, nasakit ti nakem ni Sunga iti panagreklamo ni Sangguniang Bayan Member Soriano agraman iti pannakamagsasao dagiti driver ken iti pannakaipost dagiti ladawan iti social media.
Mainaig iti daytoy, inbatad na a sidadaan ni Mr. Sunga a sanguen no adda dagiti nalabsing na iti paglintegan mainaig iti panagquarry da iti aldaw ti Domingo.
