LAOAG CITY – Kinumpirmaran ni Mr. Jhey-ar Mangati, ti Health Education ken Promotions Officer iti Mariano Marcos Memorial Hospital and Medical Center iti Siudad ti Batac nga addan iti high risk classification ti COVID-19 bed occupancy rate ti nasao nga ospital.
Segun kenkuana, daytoy ket kalpasan a nangrugin nga immadu dagiti pasiente a nakaptan ti makapatay a virus sipod idi Enero 19 a manarimaan a matamtaming iti ospital.
Gapu iti daytoy, kunana a naipasubli a napalukatan ti Field Hospital 1 a masarakan iti OPD wenno Outpatient Department driveway ken ti 5th floor eastern ward tapno maakomodar ti ngumatngato a bilang ti maitartaray a COVID-19 referrals iti nadakamat nga ospital.
Inlawlawagna nga iti baet ti agdama a mapaspasaran a situasion kas maibilang a referral center iti rehion ket agtultuloy met latta ti panangakomorda kadagiti non-COVID patients.
Inbatadna a plano ti ospital ti pannakaiyakar dagiti sumagmamano nga stable regular patients iti Field Hospital 3 a masarakan iti Catalino Acosta Memorial Elementary School wenno CAMES tapno maliklikan ti panagdudupudop dagiti pasiente no bilang saanen a maigawid ti panagngato ti kaso ti COVID-19 ditoy probinsia.
Kabayatanna, inpakaammona a mangrugi inton bigat Enero 22 ket dagiti admission ti elective surgical cases ket temporario pay laeng a masuspinde iti saan pay a masinunuo nga aldaw a panagsubli iti operasion.
Iti agdama ket adda ti pakabuklan a 96 a naka-admitt a pasiente no sadino 74 kadakuada ket nagpositibo iti COVID-19 idinto a 22 ditoy ket maibilang a suspect wenno probable cases.
Malaksid iti daytoy, innayonna nga adda ti 85 nga health care workers ti ospital ti agdama met a naka-isolate.
