LAOAG CITY – Nailatang ti dua a milyon a pisos babaen iti Sang. Panlungsod ditoy ciudad ti Laoag para iti pannakaestablisar ti covid-19 cemetery.
Segun kenni Sang. Panlungsod Member Rbee Ablan, chairman ti Committee on Social Services a saan na a kayat a sawen nga ado dagiti matay iti covid-19 ngem paset laeng daytoy iti pangasagana ti lokal a gobierno.
Inbatad na ti nasao a coivd-19 cemetery ket plano a maestablisar iti asideg ti Central Terminal, no sadinno a ditoy ti nakaitabonan idi ni Lola77 a taga Barangay 15 ditoy ciudad ti Laoag.
Awan met pay ti naiparuk-at no mano ti mabalin a maakumudar ti maestablisar ti covid-19 cemetery.
Kabayatanna, umabot iti siyam a milyon a pisos ti inlatang ti Sang. Panlungsod a pondo para iti covid-19 response.
Naamoan a 10 a milyon a pisos kuma ngem kwinestyunaran ni Sang. Panlungsod Member Juan Conrado Respicio, chairman ti Committee on Laws.
Kangrunaan a pakaigatangan ti nasao a pondo ket dagiti mausar para iti covid kas iti PPE ken dadduma pay.
Manamnama met a 10 a porsiento manipud iti pakabuklan a populasyon ditoy ciudad ti Laoag ti dumalan iti swab testing.
