LAOAG CITY – Maragsakan ni Dr. Norman Rabago, ti covid-19 consultant ditoy probinsya iti balligi a pannakaiyuswat ti umuna a vaccination roll out ditoy probinsya.
Inbatad na a ti nasao a vaccine roll out ket mangipakita ti sangsangkamaysa nga health system ditoy probinsya.
Mainaig iti daytoy, kuna ni Dr. Rabago a maysa pay a pakaragsakan na ket adon dagiti agkalikagum nga agpabakuna kalpasa a nakasangpet ti suplay.
Kuna na a daytoy ket iti laksid a sinovac vaccine ti immuna a naipaay iti probinsya, ti bakuna a saan a kayat ti kaaduan gapu iti nababa nga efficacy daytoy.
Innayun na a maragsakan unay ti puso na iti agbalbalin a napintas a resulta ti agtultuloy a kampanya ti probinsya seknan ti panagbakuna.
Kiniddaw ni Rabago ti pannakikooperar ken saan a panagbuteng iti bakuna gapu ta inkarigatan nga inaramid dagiti eksperto daytoy.
Maipalagip a nairugi idi kalman ti vaccination roll out kadagiti refferel hospital a pakaibilangan ti Mariano Marcos Memorial Hospital and Medical Center iti siudad ti Batac, Governor Roque Ablan Sr. Memorial Hospital ken iti Laoag City General Hospital ditoy siudad.
Maysa met ni Dr. Norman Rabago kadagiti immuna a nabakunaan kadwa na ti direktor ti GRASMH a ni Dr. Walberg Samonte.
