LAOAG CITY – Kinumpirmaran ni Barangay Chairman Edward Antalan iti Barangay Tartarabang iti ili ti Pinili a naka-home quarantine ti kabarangayan da a nagpositibo ti covid-19 iti baet a daytoy ket symptomatic.
Inbaga ti kapitan a mismo a dagiti kameng ti Rural Health Unit (RHU) kadwa da dagiti kameng ti Philippine National Police (PNP) ti napan nang-assess iti balay ti pasyente no mabalin nga isu ti pagtalinaedan na kabayatan ti panagrekobre na manipod iti covid-19 virus.
Kuna ni Antalan nga adda ti bukod a comfort room (CR) ti kwarto ti pasyente ken regular ti papan panang-checkup dagiti kameng ti RHU.
Mainaig iti daytoy, inadmitir ni Kapitan Antalan a gapu iti panag-home quarantine ti nagpositibo a kabarangayan da iti covid-19 ket kapilitan nga inlockdown da ti tallo a sitio iti barangay da no sadinno a 50 a balay ti apektado.
Saan met a nailawlawag ti kapitan no apay a saan a naipan iti isolation facility ti pasyente iti baet nga adda dagiti mapaspasaran na a sintomas ti covid-19 virus.
Inkalintegan na a dagiti laeng kameng ti RHU kangrunaan na ti doktor ti makasungbat iti daytoy a banag.
