LAOAG CITY – Inpakaammo ni Bombo International News Correspondent Shelly Ann Hafliger idiay Switzerland a bummabban ti kaso ti covid-19 iti nasao a pagilyan.
Gapu iti daytoy, kuna ni Hafliger a manipod idi Mayo 31 ita a tawen ket napalukayan dagiti pagalagadan kontra ti covid-19.
Inbatad na a mapalubusanen dagiti tattao a rumuar ken agturong kadagiti panganan kageddan ti panaglukat ti restaurants ken pagadalan.
Nu pay kasta, kuna ni Hafliger a naglalinaed ti panagisuot ti face mask ken pannakasurot ti social distancing.
Innayun na a 50% wenno kagudwa iti kapasidad ti maysa a pasdek ti mapalubusan laeng a maakomodar ken nagtalinaed a nakarikep ti clubs ken pubs.
Kabayatanna, inbunannag ni Hafliger a mangnamnama daytoy nga agtultuloy ti panagbaba ti kaso iti Switzerland tapno maminpinsanen a makasubli iti normal ti operasyon ti ekonomiya ken ti garaw ti tattao.