LAOAG CITY – In-inuten nga agsubsubli ti normal ti sitwasyon idiay Denmark kalpasan a naipatungpal ti lockdown gapu iti coronavirus 2019 pandemic.
Daytoy ti report ni Bombo International Correspondent Marinelle Gabuat Olalo Pedersen, taga Batac City ngem agdama nga agtrabtrabaho idiay Kastrup, Denmark.
Kuna ni Pederson, naglukaten dagiti sumagmamano a negosyo, nagsublin iti trabaho dagiti dadduma a residente ken klase iti nursery ken kindergarten iti nadakamat a pagilyan.
Nupay kasta, inbatad ni Pederson a nagtalinaed a nakaserra ti borders ti Denmark.
Iti agdama, addan ti 8,310 a kaso ti covid-19 idiay Denmark ken 5,384 dagiti nakarekobre.
Kabayatanna, inpakaammo ni Pederson nga adda ti naapektaran ti covid-19 a Pilipino idiay Denmark ngem addan iti nasayaat a kasasaad.
Malaksid iti daytoy, awan metten dagiti nadamdamag da a nagbalin a problema dagiti pada da a Pilipino idiay Denmark mainaig iti covid-19.
