LAOAG CITY – Nangiparuk-at ni Gov. Matthew Marcos Manotoc ti executive order no 174-22 seknan iti pannakaikkaten ti COVID-19 testing a kasapulan para kadagiti fully vaccinated, asymptomatic residents, turista ken APOR no sumrek ditoy probinsya.
Iti napirmaan a dukomento ti gobernador, agepekto wenno mangrugi a maipatungpal daytoy intono bigat, Pebrero 14.
Para kadagiti invaccinated wenno partially vaccinated residents, turista agraman ti APOR ket masapul a mangisumitir da wenno dumalan iti COVID-19 testing malaksid no mangipakita da ti umiso a rason wenno medical clearance nga inparuk-at ti provincial, city wenno municipal health office.
Para kadagiti unvaccinated a menor de edad a residente ditoy probinsya ken turista nga agtawen ti 12 agpababa ket saanen a kasapulan a dumalan iti testing, iti baet a kadua da dagiti fully vaccinated wenno duly exempt a nagannak kadakuada.
Saanen a kasapulan nga agquarantine dagiti sumrek ditoy probinsya ngem nasken nga agself monitor para iti anyaman a sintomas.
Kasapulan nga impormaran da ti maseknan nga LGU no maaddaan da ti sintomas ken masapul a suruten da ti national COVID-19 protocols.
