LAOAG CITY – Saan a masinunuo ni Brgy. Chairwoman Jocelyn Garcia iti Brgy. Susugaen iti ili ti Pasuquin nu adda ti epekto ti covid-19 vaccine iti pannakatay ti maysa a barangay kagawad.
Segun ken ni Garcia, addan ti dati a sakit ti natay a ni Brgy. Kagawad Albino Licuan kas iti high blood ken diabetese.
Inlawlawagna nga idi napan da nagpabakuna idi Mayo 20 ket nasaranta ti opisyal ken sakbay a nabakunaan dagitoy ket dimmalan da iti eksaminasyon.
Kabayatanna, kunana a naamoan na laengen nga idi Mayo 25 ket naggurigor ti opisyal ken idi Mayo 27 ket naipan iti ospital gapu ta marigatan nga umanges.
Nu pay kasta inapakaammo na nga itay bigat ket pimmusay ti opisyal bayat a matamtaming iti ospital.
Immunan nga inpakaammo ni Garcia a first dose pay laeng ti covid-19 vaccine ti naawat ti opisyal.
Mainaig iti daytoy, inpakaammo ni Dr. Norman Rabago, ti covid-19 consultant ditoy probinsya a maimbestigaran a nasayaat ti pudno a puon ti nakatayan ti opisyal tapno maamoan nu adda ti pannakainaig ti bakuna wenno awan.
