LAOAG CITY – Inpakaamo ni Mr. Jurgen Rushel Rapacon, ti president emeritus ti Philippine Nurses Association – Ilocos Norte Chapter a balligi ti naiyuswat a covid-19 vaccine simulation iti Brgy. Cabungaan ditoy siudad ti Laoag.
Inbatad na nga inatendaran daytoy ni Gov. Matthew Marcos Manotoc, Mayor Michael Marcos Keon ditoy siudad, barangay officials ken dadduma pay nga opisyal manipod iti nagduduma a departmento ditoy siudad.
Inlawlawag ni Rapacon a babaen iti nasao a simulation, naipadas ti pannakaiyuswat ti panagbakuna nu sadino nga adda ti naituding a waiting area dagiti agpabakuna.
Kalpasan iti waiting area, mapan iti registration area tapno madouble check ti profile ken health declaration ti indibidual nga agpabakuna sakbay a mapan iti conunselling area.
Mainaig iti daytoy, kuna ni Rapacon a sakbay nga agderetso iti vaccination area ti maysa nga indibidual, masapol a dumalan manen iti konsultasyon ken nu awan ti makita a problema ket dagus a mabakunaan.
Kalpasan ti panagbakuna, adda iti monitoring area nu sadino nga agtalinaed ditoy ti nabakunaan nga indibidual iti 30 a minutos agingga ti maysa nga oras.
Mainaig iti daytoy, kuna ti presidente ti Philippine Nurses Association – Ilocos Norte Chapter nga agtultuloy ti pannakaiwaras ti impormasyon kadagiti umuli seknan ti kinapateg ti bakuna kontra iti covid-19.
Maipalagip a malaksid iti Brgy. Cabungaan ditoy siudad, immunan a naiyuswat ti vaccine simulation iti ili ti Solsona ken iti siudad ti Batac.
