LAOAG CITY – Napalaos ti ragsak ni Ma. Zennelle Domingcil kalpasan a nakapasa iti December 2024 Licensure Examination for Certified Public Accountants (CPA).
Iti baet daytoy, kunana a naliday isuna gapu ta saan man laeng a naabotan ti amana ti pannakaipasana iti board examination gapu ta idi laeng Disiembre 11 ket pimmusay daytoy.
Inlawlawag ni Zennelle, nagbalin a pannubok kenkuana ti panag-review idiay Metro Manila gapu ta daytoy ti umuna a daras nga adayo isuna iti pamiliana.
Inbatadna a daytoy ti maikadua a daras a nag-take isuna ti nasao nga eksaminasion ken dakkel ti panagyamanna gapu ta natungpalen ti maysa kadagiti arapaapna.
Mainaig iti daytoy, inpalgakna nga idi saan a nakapasa isuna iti umuna a take-na idi Mayo ita a tawen ket saan a napukawan ti namnama gapu ta kalikagumna a paneknekan a kabaelanna kas kadagiti kakabsatna.
Emosyonal nga insagut ni Zennelle ti panagballigina iti pamiliana nangruna iti pimmusay nga amana.
Kabayatanna, saan met a mailadawan ni Mrs. Zenaida Domingcil, ina ni Zennelle ti kinaragsakna ken inyarasaasna laengen ti bangkay ti asawana ti balligi ti anakna.
