LAOAG CITY – Pabor ni Atty. Kiddz Castro, Criminal Law Professor ti Northwestern University ditoy siudad ti Laoag iti pannakaipababa ti age criminal liability idiay Queensland.
Daytoy ket kalpasan a nangipasa ti Australian State ti linteg a dagiti ubbing nga agtawen ti 10 ket mapatawan ti pannusa kas kapada kadagiti nataengan no nakombiktaran ti krimen kas ti murder, serious assault ken break-ins.
Segun ken ni Castro, naputar ken naaprobaran ti nasao a linteg idiay Queensland gapu ta makita dagiti agpanpanday linteg nga umad-adu dagiti ubbing nga agar-aramid ti nagduduma a krimen.
Inbatadna nga umanamong isuna no bilang adaptaren ti Pilipinas ti Queensland nangruna ket adu dagiti mapaspasamak nga insidente iti uneg mismo ti pagadalan.
Kunana nga ad-adda a kasapulan ti gobierno ita nga adalen ti pannakaipababa ti age criminal liability nangruna ket agarup amin nga ubbing ket kabaelanna ti agusar kadagiti nagduduma nga online platform.
Mainaig iti daytoy, inpakaammo ni Atty. Castro a ti pannakaipababa ti age criminal liability ditoy pagilian ket maysa a wagas tapno madisiplina dagiti ubbing.
Innayonna a basar iti nailanad iti Civil Code kangrunaanna iti Article No. 2180 ket mabalin a mapagsungbat dagiti nagannak dagiti maseknan nga ubbing a naglabsing iti linteg.
Immuna iti daytoy, umad-adu ti bilang dagiti maibalbalod nga ubbing idiay Queensland gapu iti panaglabsingda kadagiti nagduduma a krimen.
