LAOAG CITY – Balligi a naarestar ti maysa a lalaki babaen iti naisayangkat a search operation iti Brgy. 17, Tabug iti siudad ti Batac.
Daytoy ket iti panagbibinnulig ti Philippine National Police iti siudad ti Batac, Provincial Drug Enforcement Unit ken Philippine Drug Enforcement Agency.
Nabigbig ti subject ti operasion a ni Michael Bulalayao, agtawen 40 ken residente iti nasao a barangay.
Basar kadagiti otoridad, bayat ti panagsukimatda iti uneg ti kuarto iti pagtaengan ti suspek ket nakitada dagiti sumagmamano a maatap a shabu iti rabaw ti durabox.
Mainaig iti daytoy, apaman nga agrubrubuat ti anak ti suspek a babai a maysa a criminology student a mapan agbasa ket nagatap dagiti otoridad isu a sinukimatda ti nagian ti bag-na a nakakitaanda pay ti maipagarup a napagango a bulong ti marijuana.
Gapu iti daytoy, posible a mapilaan ti kaso ti anak ti suspek pakairamanan ti asawana agsipod ta rumrummuar a pinawilanna dagiti otoridad a mangiwayat ti search operation iti baet nga adda ti naiserbi a search warrant kadakuada.
Malaksid iti daytoy, naammoan a maipagarup nga inyawat ti asawa ti suspek ti bag iti anakna a nakaipalaonan dagiti nakumpiskar a napagango a bulong ti marijuana.
Kabayatanna, segun iti suspek ti search operation a datin a natiliw isuna idi 2020 gapu met laeng iti panaglabsing iti Republic Act No. 9165 wenno ti Comprehensive Dangerous Drugs Act of 2002 ken naibalud iti tallo a tawen ngem naabsuelto daytoy.
Naiget a naglikudan ti suspek a kukuana dagiti naala nga iligal a droga iti pagtaenganda.
Immuna iti daytoy, kuna ti asawa ti suspek nga adda ti immun-una a simrek iti pagtaenganda sakbay pay a pormal a nangrugi ti search operation.
Iti agdama, agtultuloy ti isaysayangkat nga imbestigasion dagiti otoridad maipapan iti nasao nga operasion.
