LAOAG CITY – Nagpalagip ti Civil Service Commission kadagiti empleado ti gobierno seknan iti partisan political activities.
Segun ken ni Ms. Marina Garcia, Director II ti Civil Service Commission ti Ilocos Norte Field Office, naiget a maipawil a mangbukel ti maysa nga organisasion, asosasion, komite wenno dadduma pay tapno makaukkon ti butos para iti maysa a kandidato kas maibasar iti Joint Circular No. 1 Series of 2016 ti Civil Service Commission ken ti Commission on Elections.
Inbatadna a naiget met a maipawil iti maysa nga empleado ti gobierno a mangidaulo ti political meetings ken pannakipaset ti political rallies.
Kunana a saan a mabalin nga agi-display kadagiti campaign materials tapno ipakita ti suporta ti maysa a kandidato pakairamanan ti panagisuot ti bado nga adda ti tatak wenno rupa ti nagpaidasig iti eleksion.
Inlawlawagna a karaman dagiti job orders ken contractual employees a sakupen ti nasao a pagannurotan.
Innayonna nga iti agdama ket awan met dagiti naaw-awatda pay a report nga adda ti empleado a naglabsing iti nasao a pagalagadan.
