LAOAG CITY – Naiget a supsuportaran ti City Social Welfare and Development Office ti grupo dagiti babbai ditoy ciudad tapno itampok ti produkto ken negosyo kasta met ti livelihood assistance para kadagitoy.
Segun ken Ms. Perlita Cabello, babaen iti koordination ti opisina da iti Department of Trade and Industry (DTI), Department of Labor and Employment (DOLE), Technical Education and Skills Development Authority (TESDA), ken Department of Science and Technology (DOST) ket maipapaayan dagitoy nga organization ken grupo ti training para kadagiti produkto da kas kuma iti banana chips, taro chips, malunggay cookies, pakairamanan dagiti water lily and bamboo weavers ditoy ciudad.
Malaksid iti training, kuna ni Cabello nga adda ti pondo ti opisina da a mausar no adda iti kiddawen dagiti women’s club nga equipment para iti negosyo da.
Inbatadna a mabalin da pay mangibaga kadagiti nadakamat nga ahensia para iti nayun a tulong nangruna kadagiti food processors.
Kabayatanna, kuna pay ni Cabello a tumultulong pay isuda a mangitandudo ti produkto dagitoy, pannakapaintas ti pacakaging ken uray ti pannakaikalako dagiti produkto.
Mangnamnama ni Cabello a babaen kadagitoy a programa nga ipapaay ti lokal a gobierno ti ciudad ket makatulong iti kaaduan nangruna iti pagbiagan wenno pagsapulan da dagitoy.
Kiddawna kadagiti grupo ken organization a taripatwen dagiti naipaay a pasilidad kadakuada tapno ad-adu pay a produkto ti maaramid ken maiyamammo saan laeng ditoy ciudad ni di ket iti kabangibang pay a lugar.
