LAOAG CITY – Ad-adda pay a mapaigetan ti pannakaipatungpal ti curfew hours iti paset ti IT Park iti ili ti San Nicolas.
Segun ken ni Mayor Mike Hernando iti nasao nga ili, adda ti naisayangkat a panagtataripnong dagiti operators ken kameng ti Philippine National Police iti ili ti San Nicolas maipapan kadagiti mapaspasamak a riribok ken panagkakabil iti nadakamat a parke.
Inbatadna a ditoy a napagnunumoanda ti naiget a pannakaipatungpal ti curfew hours no sadino masapol nga iti oras ti ala una ti parbangon ket isu ti maudin a pannaka-serve dagiti mainom kadagiti pasdek ken nasken nga agrikep iti oras ti alas dos ti parbangon dagiti maseknan nga establishimemto.
Inlawlawagna a ginutigotna pay dagiti security guard officers nga asideg iti IT Park a kitaen a naimbag dagiti tattao iti lugar tapno malappedan dagiti agririri.
Kunana nga adda ti immunan a naipatulod a surat kadagiti operators ngem adda latta dagiti napaspasamak a panagriribok a nangitunda ti panagririri dagiti indibidual wenno grupo.
Innayonna a posible a saan a maipabaro ti business permit dagiti aglabsing iti daytoy a pagannurutan.
Immuna iti daytoy, adda dagiti sumagmamano nga indibidual ti nagririri iti IT Park a nangitunda ti saan a napintas nga imahe iti publiko.
