LAOAG CITY – Inbutaktak ti government contractor a ni Pacifico “Curlee” Discaya II a nakadepende iti nakatugaw nga opisial ti kidkiddawen a porsiento iti proyekto dagiti kongresista iti babaen ti “bag man-da” manipud kadagiti kontraktor.
Inaramid ni Discaya ti rebelasion iti agtultuloy nga imbestigasion ti Senate Blue Ribbon Committee hearing iti maanomaliya a flood control projects.
Iti binasa nga affidavit ni Curlee Discaya, dinakamatna a nangrugida a nakipagpaset iti bidding iti proyekto ti gobierno idi 2012.
Inbuksilan ni Curlee a basar iti obserbasionna, idi panawen ti dati ken pimmusayen a ni Presidente Benigno “PNoy” Aquino III, dumanon iti 10% ti kickback a maipagarup nga aw-awaganda ti “padulas” wenno ti kuarta nga al-alaen ti bag man manipud iti kontraktor.
Ngimmato met daytoy ti 12% agingga iti 15% iti babaen idi ni dati a Presidente Rodrigo Duterte idinto a dimmoble pay ti 25% agingga iti 35% iti babaen ti agdama nga administrasion.
Nupay kasta, kunana a dagiti kongresista, senador ken sumagmamano nga opisial ti Department of Public Works and Highways laeng ti addaan ti papel iti panangala ti kickback.
Inbutaktak pay ti contractor a no saanda nga umannugot iti nasao nga aramid ket iyar-aramidanda ti problema kadagiti proyektoda kas ti mutual termination wenno isyu iti right of way.
Malaksid iti daytoy, kunana nga us-usarenda tapno butbutngen isuda ti panang-blacklist kadakuada iti uneg ti maysa a tawen no sadinno a saandan a makapagpartisipar kadagiti bidding isu a mapilpilitanda laengen a sumurot.
