LAOAG CITY – Mamati ti Philippine Olympic Committee a makastrek iti semifinal round ti curling mixed doubles ti pambato ti Pilipinas iti agtultuloy a 2025 Asian Winter Games idiay Harbin, China.
Daytoy ket kalpasan nga inabak ti curling team da Kathleen Dubberstein ken Marc Pfister ti Kazakhstan iti iskor nga 11-2 isu a nakastrekdan iti semis qualifiers.
Adda iti maikadua a puesto ti Pilipinas iti Group B nga addaan ti uppat a panangabak ken maysa a pannakaabak idinto ti China ket adda iti umuna a puesto nga addaan ti lima a panangabak ken awan pay ti abakna.
Naammoan a kas host country ket nakastrek metten ti China iti semifinals ken adda iti maikatlo a puesto ti South Korea nga addaan ti tallo a panangabak ken dua a pannakaabak.
