LAOAG CITY – Siguradon a makagun-od ti naisangsangayan a medalya iti Asian Winter Games ti curling team ti pagilian.
Daytoy ket kalpasan a nakastreken dagiti Pinoy curlers a bukbuklen da Marc ken Enrico Pfister, Christian Haller ken Alan Frei iti Asian Winter Games a maisaysayangkat idiay Harbin, China.
Inabakda ti host country a China iti iskor a 7-6 tapno naan-anayen a makastrek iti finals no sadinno a siguradon ti silver medal para kadakuada ket no mapagasatanda pay ket maalada ti balitok a medalya.
Makasango ti Pilipinas ti South Korea iti finals inton rabii ita nga aldaw ti Biernes.
Tinambakan ti South Korea ti Hong Kong iti iskor a 13-2 iti semifinals match-da.
Naammoan a sakbay a nakastrek iti semis ti curling team ti pagilian ket inabakda pay laeng ti Japan iti iskor a 10-4.
Kabayatanna, kalikagum met dagiti Pinay curlers a mangabak kontra iti South Korea.
