LAOAG CITY – Inpakaammo ni Sangguniang Bayan Member Marvin Pascua iti ili ti Solsona a Cyber Libel ti posible a kadagsenan a maipila a kaso kontra iti adda iti likudan ti dummy account nga Akron Hammer.
Segun kenkuana, daytoy ket kalpasan a napagsusurutna dagiti amin a banag ken pasamak a mabalin a mausar kas ebidensia a pammaneknek a ti atapenna nga indibidual nga aglemlemmeng iti dummy account ket pudno.
Inbatadna a babaen kadagiti inwayatna nga imbestigasion iti tulong dagiti maseknan nga indibidual ken establishimento ket nagbalin a nalawag ti atapna.
Gapu iti daytoy, kunana a manamnama nga idatag ken ibutaktakna ti kinaasinno iti adda iti likudan ti dummy account nga Akron Hammer.
Mainaig iti daytoy, inpetteng ni Konsehal Pascua a nakasagana isuna a dumatag ken tumulong kadagiti tattao a posible a nagbalin a biktima iti nasao a dummy account.
Kunana a mamati isuna a maymaysa a tao ti adda iti likudan ti dummy account nga Akron Hammer.
Innayonna nga inpursigena nga imbestigaren ti nasao a dummy account tapno madalusan ti naganna kalpasan a rumrummuar a maitudtudo nga isuna iti adda iti likudan ti dummy account nga Akron Hammer.
