LAOAG CITY – Inbatad ni Department of Agriculture (DA) Secretary Francisco Tiu Laurel Jr. nga agtultuloy ti pannakikoordinar ti ahensia kadagiti sub-agency-na tapno makabukel ti solusion tapno makissayan ti epekto ti pangta ti nakaro nga El Niño a manamnama a mapasaran ditoy pagilian.
Mainaig iti daytoy, binilin ni Laurel ti National Food Authority (NFA) nga usaren ti dakkel a porsion ti budget-na tapno agresibo a makagatang ken maka-ukkon ti pagay ken bagas tapno mapunno dagiti warehouse-na.
Iti baet daytoy, impasigurado ti ahensia a napunno dagiti cold storage facility para kadagiti nagduduma a produkto nga agrikultural, kabayatan ti agtultuloy a pannakaipaay ti solar pump irrigation kadagiti lugar nga addaan ti pagalaan ti danum tapno makissayan ti epekto ti panagtikag.
Innayon pay ti Sekretario nga agtaltalinaed a kumpiansa ti ahensia a saan a maawanan ti publiko dagiti magatang kadagiti nagduduma a merkado.
Kabayatanna, kinunana ti Sekretario a nailatangan ti ahensia ti P2.6 billion a pondo manipud iti kidkiddawenda a P45-billion supplemental budget para iti insigida a pannakaipatungpal kadagiti mitigating measures kontra iti krisis ken iti El Niño.
Namnamaen pay ti departamento ti kanayunan pay a P10 billion para iti solar irrigation, pumps ken bio-fertilizers, pakairamanan payen iti Presidential Assistance to Farmers and Fisherfolks kas paset ti panagsagsagana ken pannakaipaay ti tulong para kadagiti mannalon ken mangngalap.
