LAOAG CITY – Ginutigot ti Department of Agriculture ti kamara de representantes a maiyalud-od ti Rice Competitiveness Enhancement Fund wenno Rice Fund agingga intono 2030 gapu iti nagbalin a positibo nga epekto na iti industriya ti bagas iti pagilian.
Ti Rice Fund ket naipalaon iti Rice Tariffication Law a plano nga amendaran iti Kamara de representantes.
Daytoy ket manipod iti taripa a makolkolektar kadagiti imported rice ti private sector manipod iti 2019 agingga iti 2025 no sadinno a maus-usar tapno ma-modernize ken mapadur-as ti rice industry ti pagilian.
Segun iti Department of Agriculture, umab-abot iti P10-B ti Rice Fund a maus-usar iti kada tawen tapno maka-provide ti kalidad a bin-i ken maipangato ti mapastrek dagiti mannalon.
Aggapo pay iti nasao a pondo ti pinansyal a tulong a maipapaay kadagiti mannalon nga addaan laeng ti dua nga ektarya agpababa a taltalunen.
Mainaig iti daytoy, inlungalong ni Department of Agriculture Undersecretary Christopher Morales iti Kamara de representantes nga iti panangamendar da iti Rice Tariffication Law ket ikonsiderar da ti mangnayun ti pondo para iti farm inputs ken post-harvest facilities, pannakapapigsa ti regulatory functions ti Bureau of Plant Industry, ken dadduma pay nga areas a dakdakamaten ti departamento tapno ad-adda pay a mapapigsa ti pagbiagan dagiti mannalon.
