LAOAG CITY – Inlawlawag ti Department of Agriculture (DA) a ti “insoluble and floating” fertilizer a nakita iti maysa a viral video manipod iti Ilocos Norte ket resulta ti saan nga usto nga aplikasyon ken saan a gapu iti ‘poor product quality.’
Ti klaripikasyon ket kalpasan ti balidasyon ken monitoring activity nga insayangkat ti DA Regional Field Office–Ilocos manipod Dec. 21 agingga iti Dec. 22 tapno imbestigaren dagiti pakaseknan wenno panagamak a nadakamat iti online maipanggep iti kalidad ti government-distributed fertilizers.
Iti maysa nga statement, indanun ti DA ti panagamak maipanggep iti integridad ti government-procured inputs.
Basar iti imbestigasyon, ti abono a nadisenyo para iti basal application, ket naiyaplikar kas side-dress.
Nabigbig ti fertilizer kas DANAT Complete Fertilizer (14-14-14), a naala iti babaen ti local government unit.
Naiyadal metteng kadagiti mannalon iti umiso nga application process tapno malapdan ti kapada nga insidente.
Nagyaman met dagiti mannalon iti ahensya iti dagus a panangsolusyon da iti naipost iti online mainaig iti usto a panangusar ti DANAT Complete Fertilizer.
Kabayatanna, inbatad manen ti DA–Ilocos Region nga amin a naibunong nga abono ket dimmalan iti quality testing, re-testing, ken naiget a quality control procedures iti DA laboratories and Fertilizer and Pesticide Authority-accredited facilities.
