LAOAG CITY – Inbutaktak ni Department of Agriculture Undersecretary Asis Perez ti immuna a panagrekomendar ti ahensia ti panagngato pay ti taripa ti bagas ti agingga 50%.
Iti maysa a panagdengngeg iti Senado nga indauloan ti Senate Committee on Agriculture, Food and Agrarian Reform, inbatad ni Usec. Perez a ti dati a rekomendasionda ket ti 50% a panagngato ti taripa ti bagas ngem ti kabaliktaran ti napasamak.
Manipod iti 50% a panagngato ket naaddaan ti panagkissay ken panagbaba ti taripa ti agingga iti 15% laengen.
Ti nasao a rekomendasion ket naiyuswat iti sangoanan ti Committee on Tariff and Related Matters, maysa a Cabinet-level inter-agency committee a mangtaltalantan kadagiti isyu maipanggep iti taripa. Ti rekomendasion daytoy ket maisubsubmitir iti National Economic and Development Authority Board nga idadauloan ti Presidente ti pagilian.
Iti baet daytoy, konkonsultaren ti Department of Agriculture maipapan iti panagbaba ti taripa sakbay pay daytoy nga inaprobaran.
Maipalagip a manipod iti 35% a dati a taripa iti bagas ket naipababa daytoy iti 15% iti kalikagum ti gobierno a bumaba ti agingga P7.00 iti kada kilo ti presio ti bagas iti intero a pagilian.
Inaprobaran daytoy ti National Economic and Development Authority Board idi Hunio 3, 2024 ken agpaut ti pannakaipatungpalna agingga inton 2028.
