LAOAG CITY – Kumpiansa ti Department of Agriculture a bumaba ita a tawen ti bilang ti rice imports ditoy pagilian.
Basar iti ahensia, daytoy ket gapu metten iti natibker a suplay ti lokal a produksion ti irik.
Inbatad ni Department of Agriculture Spokesperson Assistant Secretary Arnel de Mesa, ita a tawen ket adda iti 3.8 agingga iti 4 million Metric Tons ti inangkat a bagas.
Daytoy ket nababbaba ti bilangna maidasig iti inangkat a bagas iti napalabas a tawen a dumanon iti 4.8 a metriko tonelada.
Ti panagbaba daytoy ket katukad ti 804,347 metric tons iti volume ti imported rice.
Mamati ti opisial nga ita a tawen ket makasubbot iti apit dagiti lokal a mannalon iti pagilian gapu iti napintas a produksion ti irik.
Iti agdama, awan ti panagdanag dagiti mannalon iti aniaman a pangta ti El Niño, La Niña ken dagiti bagyo a saan a kas kadagiti naglabas a tawen.
