LAOAG CITY – Nagkiddaw ti Department of Agriculture (DA) ti ₱198.45 bilion a badyet para iti 2027 tapno mataginayon ti produksion ti taraon, masalakniban ti maggedan dagiti mannalon ken mangngalap, ken mapapigsa ti food security ti pagilian.
Daytoy ket ₱17.25 bilion wenno 8 a porsiento a nababbaba ngem ti ₱215.69 bilion nga inaprobaran a badyet ti DA ita a tawen. Basbassit daytoy ngem ti ₱260 bilion nga immuna a kiniddaw ti ahensia manipud iti Department of Budget and Management.
Ti dakkel a paset ti panagbaba ket gapu iti pannakakissay ti pondo para kadagiti farm-to-market roads agingga iti ₱16 bilion, manipud iti ₱33 bilion ita a tawen.
Iti laksid ti nababbaba a badyet, kinuna ni Agriculture Secretary Francisco Tiu Laurel Jr. a kasapulan a tamingen ti ahensia ti nangato a gastos iti produksion, nadumaduma a kasasaad ti paniempo, climate risks ken market uncertainties.
