LAOAG CITY – Naiget a banbantayan ti Department of Agriculture (DA) ti possible nga epekto iti sektor ti agrikultura ken trade ti pagilian ti agtultuloy a tension iti Middle East.
Iti inparuk-at nga statement ti ahensya, inbatad ti Department of Agriculture a ti nabayag a gubat iti rehiyon ket mabalin a makaapektar a dagus iti agrikultura ti Pilipinas, aglalo ket mangnamnama laeng ti pagilian iti panagangkat ti sumagmamano a napapateg a produkto.
Segun ken ni Agriculture Secretary Francisco Tiu Laurel Jr., mabalin a ngumato ti presyo ti langis iti world market nga agresulta ti nanginngina a gastos iti krudo, abono ken freight.
Inpetteng ti Department of Agriculture a no agtultuloy ti panagngato ti presyo ti krudo ket ngumato met ti magastos iti farm inputs dagiti lokal a mannalon.
Innayon na a possible pay a ngumato ti shipping rates gapu ta nanginngina ti fuel, a mangipangato met ti landed cost ti imported nga arina ken animal feed.
No mapasamak daytoy ket mabalin a ngumato ti presyo ti tinapay, manok, ken baboy iti merkado banag a mabalin a makaapektar iti panangikarkarigatan ti gobierno a makontrol ti food inflation.
Immunan nga inpasigurado ni Presidente Bongbong Marcos Jr. nga umdas ti suplay ti langis iti pagilian iti baet ti tension iti Middle East.
