LAOAG CITY – Nangipila ti apela ti Department of Agriculture (DA), babaen ti Office of the Solicitor General (OSG), iti Korte Suprema tapno baliwanna ti desisionna a mangipalubos kadagiti commercial fishing vessels a sumrek iti municipal waters, gapu ta para laeng daytoy kadagiti babassit a mangngalap kasa naibasa iti Fisheries Code.
Indagadag ni Agriculture Secretary Francisco Tiu Laurel Jr. iti Korte Suprema nga ireview da ti desisionna tapno masigurado ti sustainability ti panagkalap iti coastal areas ti pagilian.
Segun ken ni Laurel mabalin a makaitunda daytoy ti dakes nga epekto iti pagbibiagan dagiti babassit a mangngalap ken ti epektona iti marine ecosystem.
Gapu iti daytoy, inkari ti sekretario a salaknibanna ti interes dagiti babassit a mangngalap.
Maipalagip nga immuna a pinasingkedan ti First Division ti Korte Suprema ti desision iti Malabon Regional Trial Court a nangideklara a maikontra iti konstitusion dagiti probision ti preferential access ti Fisheries Code.
Daytoy ket kalpasan ti petision nga inpila ti Mercidar Fishing Corporation.
