LAOAG CITY –Inbatad ti Department of Agriculture a paigetnan ti ahensia ti kampanyana kontra kadagiti peke, saan a rehistrado, adda laokna, ken illegal a naaramid nga agricultural inputs, kalpasan nga imbilin ni Agriculture Secretary Francisco P. Tiu Laurel Jr. ti Fertilizer and Pesticide Authority (FPA) a paigetan ti panagbantay iti merkado ken pannakaipatungpal dagiti regulasion.
Daytoy ket kalpasan a naduktalan ti maysa a team manipud iti FPA ken Police Provinccial Office, kadwa da ti Talavera ken Rizal Police ti maysa a pasilidad no sadinno a nakita dagiti otoridad ti ginasot a sako ti fertilizer products a maimapagarup a naipenpen wenno naaramid nga awan ti rehistrona.
Segun iti pammilin, gagemna ti naiget a pannakalapped ti pannakaiserrek iti merkado kadagiti mapagduduaan a farm inputs, protehiran dagiti mannalon kontra iti posible a pannakalugi , ken masigurado a saan a kakaasi dagiti lehitimo a manufacturer ken dealer gapu kadagiti operator a manglikliklik kadagiti regulasion.
Dagitoy ket pakairamanan ti naiget a panagbantay kadagiti online marketplace ken pisikal a pagtagilakoan bayat a matiliw dagiti maipagarup a karaman iti pannakaaramid wenno pannakaipaay ti ilegal nga agricukltural inputs.
