LAOAG CITY – Napintas ti inpaulog ti Department of Agriculture Central Office a pagannurotan kadagiti amin nga ili ken probinsia nga adda ti taraken a baboy a naisakripisio ti biagna gapu iti kaadda ti nagpositibo iti African Swine Fever wenno ASF virus iti bukud dagitoy a lugar.
Inlawlawag ni Provincial Veterinarian Dr. Loida Valenzuela nga adayo a napinpintas ti naiyetnag a “package” iti maipaay nga “indemnification” wenno sukat dagiti napukaw a taraken.
Inbatadna a no iti dati ket lima ribu a pisos ti maipaay iti tunggal maysa a maisakripisio ti biagna a baboy, burias man wenno “fattener” wenno “grower” ita ket uppat a ribu ti maipaay kadagiti burias agingga iti “grower”, walo ribu kadagiti “fattener” ken sangapulo ket dua ribu a pisos kadagiti “breeder.”
Segun kenkuana, nababbaba bassit daytoy ngem iti ipapaay ti Phil. Crop Insurance Corp. wenno PCIC.
Nupay kasta, inpalagipna a no agpailista dagiti kakailian kadagiti tarakenda iti PCIC ket masapul a siguradoenda a ti pudno a bilang dagiti baboy ti maipalista.
Kunana nga adda ti gundaway iti kallabes a saan nga inkonsiderar ti PCIC ti naipalista kadakuada kalpasan a maysa laeng ti naipalista idinto a lima ti taraken ti maseknan nga “hog raiser.”
Inlawlawagna nga inkalintegan ti PCIC a saanda a masinunuo no ayanna kadagiti taraken ti maseknan ti pinailistada a tarakenda.
Innayonna nga aramid met laeng dagiti maseknan no adda iti pakababalawanda a saan a rumbeng a maipabasol iti gobierno gapu ta adda dagiti masursurot a pagannurotan.
