LAOAG CITY – Saan a mamati ti Department of Agriculture (DA) a manarimaan a makapaspasar ita ti food shortage ti pagilian gapu ta saan met nga agkurkurang dagiti suplay iti merkado.
Inbatad ni Agriculture Secretary Franscisco Tiu Laurel Jr., saanna a maawatan no ayanno ti paggapgapoan dagitoy a damag ken ania ti nangibasaranda a datos.
Kunana nga awan ti makitkita a panagkurang iti suplay kadagiti basic commodities nangruna ita a panagaapit inton sumaruno a bulan.
Kabayatanna, awan ti food shortage ngem posible nga adda ti sumagmamano a paset ti pagilian ti makapaspasar ti panagbisin gapu iti ekonomia ken saanen a konektado iti agrikuktural a sektor.
Inpasingked ti sekretario, awan ti nasken a pakadanagan ti publiko kadagiti suplay dagiti kangrunaan a magatgatang gapu ta saan met nga agkurkurang iti suplay ti sektor ti agrikultura tapno maka-produce kadagiti raw materials.
Inpalgakna a dry season laeng ti nagbalin a rason no apay ti bassit a problema a panagkurang iti suplay.
Inpasigurado ni Laurel nga agarup amin a raw materials a kasapulan ti merkado ket adu ken umdas ti suplay.
Agtultuloy ti Department of Agriculture iti pannakaipatungpal dagiti inisyatibo tapno maipababa dagiti presio dagiti magatgatang nangruna kadagiti dadduma a basic commodities kas ti bagas ken karne ti baboy para iti nalaklaka a panaggatang iti merkado.
