LAOAG CITY – Target ti Department of Agriculture nga agpaot ti panaglako ti bagas iti P29 kadagiti kadiwa.
Iti Pre-State of the Nation Address briefing, kinuna ni Department of Agriculture Secretary Francisco Tiu Laurel a nasaysayaat a makitada ti taray ti supply chain manipud taltalon agingga iti retail no mailako iti napaut a panawen ken saan laeng nga agingga iti dua a bulan.
Kinunana, nasaysayaat a maammoan no ania ti problema ken no ania ti kaepektibuan a wagas tapno maipababa ti presio ti bagas.
Kinunana pay a makatawen ti kasapulan tapno makita ti supply chain, manipud panagmula iti bukel wenno bin-i, panagusar iti abono agingga a maapit, no ayanno ti pakaidulinan agingga retail.
Iti agdama, magatang iti P29 ti kada kilo ti bagas kadagiti 13 a kadiwa outlet-da, ngem limitado daytoy iti 10 kilos ti tunggal maysa para kadagiti 4P’s beneficiaries, senior citizens, Persons with Disabilities, ken single parents.
