LAOAG CITY – Saan a nakaatendar dagiti miembro ti pamilya Marcos pakairamanan ni Mayor Michael Marcos Keon iti State of the Province Address wenno SOPA ni Gob. Matthew Marcos Manotoc.
Uray da Sangguniang Panlalawigan Member Rodolfo Christian Fariñas Jr. ken ni Bokal James Paul Nalupta ket saan a nakaatendar iti SOPA.
Basar iti nakalap ti News Team ti Bombo Radyo Laoag, saan a nakaatendar ni Presidential Aspirant Bongbong Marcos gapu ta iti agdama ket naka-isolate kalpasan a na-exposed iti COVID-19 patient idinto a dagiti dadduma ket saan pay a masinunuo ti rasonda.
Naobserbaran met ti Bombo Radyo Laoag nga adda nagan ni Mr. Sandro Marcos kadagiti tugaw a nairanta a nagtugawan dagiti bisita ngem saan a nagpakita kabayatan ti SOPA idinto nga awan ti nakita a nagan ni Laoag City Mayor Michael Marcos-Keon.
Iti SOPA ti gobernador ket sinaggaysa na dagiti nagapwanan ti liderato na a pagsayaatan dagiti umili ken ti sibubukel a probinsya.
Sakbay a nagngudo ti SOPA ni Gob. Manotoc ket napadayawan dagiti sumagmamano a Barangay iti Siudad ti Batac ken ditoy Siudad ti Laoag pakaseknan iti panangpatalinaedda a nababa ti kaso ti COVID-19 iti kallabes babaen iti Barangay Incentivization Program.
Iti Siudad to Batac ket napadayawan iti Brgy. Maipalig, Valdez, Barani, Biningan, Sumader ken Nagbacalan idinto a ditoy Siudad ti Laoag ket iti Brgy. 32-C, La Paz East, 3 Del Rosario, San Agustin, San Vicente, San Quirino, San Pedro, Suyo, Talingaan, Nangalisan East, Lataag, Bacsil North ken Dibua North.
Naikkan ti nasurok a 100 a ribu a pisos ti kada Barangay a nakagun-od ti pammadayaw.
