Nagballaag ti Department of Justice (DOJ) a mabalin a sumango iti kaso ti administratibo dagiti polis ken opisial ti gobierno no maduktalan a nakakontakda iti International Criminal Court (ICC) para iti imbestigasion ti drug war ti administrasion ni Duterte.
Kasaruno daytoy ti puesto ni dati a Sen. Antonio Trillanes IV a nangibaga a direkta a makikontak dagiti imbestigador ti International Criminal Court kadagiti 50 nga aktibo ken dati nga opisial ti Philippine National Police (PNP) mainaig iti mapapati a krimen kontra iti dati a Presidente Rodrigo Duterte.
Inbatad ni Trillanes a mabalin a maibilang a suspek dagiti nadakamat nga opisial ti pulisia ken tiliwen ti Interpol no saanda a makitinnulong iti International Criminal Court.
Iti Malacañang press briefing, inpatalged ni Department of Justice Spokesperson Mico Clavano nga adda dagiti probision iti babaen ti R.A. 6713 kadagiti opisial ti gobierno a manglabsing iti ethics ken conduct.
Kabayatanna, inulit ni Clavano ti takder ni Presidente Marcos nga awan ti responsibilidad ti Pilipinas iti International Criminal Court gapu ta saanen a kameng ti pagilian iti Rome Statute.
