LAOAG CITY – Naipadalan iti disimpeksiyon dagiti ramit ti Laoag International Airport kas panangipaay ti proteksiyon kadagiti pasahero nga agsangpet ken agbiyahe manipud iti pangta ti coronavirus disease.
Segun kenni Ronald Estabillo, airport manager iti Laoag International Airport, kangrunaan a naipadalan ti disimpeksiyon dagiti door knob, tugtugaw, counters ken dadduma pay iti terminal building.
Kuna na a mangiwayat da pay ti disimpeksiyon iti sumaruno a lawas kadagiti nasao a ramit.
Inbatad ni Estabillo a sursuruten da ti pammilin ni Gov Matthew Marcos Manotoc kas panaglapped ti possible a panagwaras ti virus.
Innayon na a nangipatulod ti Department of Health kadagiti tao na, agraman dagiti empleyado ti Philippine Airline ken dagiti nurse nga empleyado ti airport tapon agtitinnulong dagitoy a mangkita ti temperatura dagiti agsangpet a pasahero iti eropuerto.
Binalakadan ni Estabillo dagiti agbiyahe nga agparebook iti Philippine Airlines gapu ti community quarantine nga ipatungpal ni Presidente Rodrigo Duterte a mangrugi intono Marso 15 ken agngudo intono Abril 14 ita a tawen.
