LAOAG CITY – Inbatad ni Brgy. Chairman Elviro Agoo iti Brgy. Davila iti ili ti Pasuquin nga iti tiempo ti amihan ket ad-adda a dadakkel nga ikan ti makalap dagiti manggalap iti nasao a barangay.
Kuna na a daytoy ket partikular iti tuna, durado, blue marlins ken dadduma pay a klase ti dadakkel nga ikan.
Immuna iti daytoy, inlawlawag ni Agoo a nu madanon ti nasao a tiempo ket narigat ti agkalap iti payao nga adda iti 30 a milya ti kaadayo na manipod iti shoreline gapu iti napigsa a dalluyon.
Inbatad na nga 12-15 a milya ti kaadayo na manipod iti shoreline laeng ti madanon dagiti manggalap nu tiempo ti amihan ken dita a makalap ti dadakkel nga ikan.
Kabayatanna, kuna ni Agoo a dagiti makalap a dadakkel nga ikan kangrunaan ti tuna ket maipatpatulod iti Metro Manila.
