Inpasingked ni Sangguniang Panlungsod Member Edison Bonoan, Chairman ti Committee on Transportation a dakkel a tulong iti problema ti trapiko partikular iti “rush hour” ti pannakaipatungpal ti “No Left Turn Policy” a mangrugi intono Oktubre 28.
Segun kenni Bonoan, saan a mabalin nga agpakattigid a direksiyon dagiti vehikulo nga aggapu iti “airport road” nga agpasentro ditoy ciudad ti Laoag iti oras ti alas-7 agingga 8:30 ti bigat ken 4:30 agingga 6:30 ti rabii.
Nupay kasta, inbatad na a mabalin nga aramaten dagiti vehikulo nga aggapo iti airport road dagiti “alternate routes” a paset ti Bgy. 50 Buttong ken Bgy. Nangalisan B, kalpasan na ket kamangen da ti Manila North Road para iti panagturong da iti sentro ditoy ciudad ti Laoag.
Mainaig iti daytoy, maysa kadagiti arungaing dagiti pampasahero a jeep kangrunaan na iti rota a Gabu-Laoag ket saan da a mabalin ti “agcutting trip”.
Inpetteng ni Bonoan nga awan ti masalungasing a pagalagadan ti LTFRB no maaramat ti Bypass Road a rota dagiti maseknan a driver gapu ta adda ti naikeddeng nga oras iti pannakaipatungpal ti “No Left Turn Policy”.
Inbatad na a saan met nga agmalmalem a maipatungpal ti nasao a pagalagadan isu nga ipatungpal da pay laeng ti “experimental traffick scheme” iti las-od ti tallo a bulan.
Innayon na a no makita da a saan nga epektibo ti nasao a “traffick scheme” ket saan da nga ituloy nga ipatungpal daytoy.
