LAOAG CITY – Kalikagom ni Barangay Chairwoman Marilyn Resquir iti Barangay 48-A, Cabungaan ditoy ciudad ti Laoag a matarimaan iti kabiitan a panawen ti naabutan nga imburnal iti barangay da.
Segun kenni Resquir, kasaritan nan to ti contractor iti proyekto a ni Engr. Rolando Patoc tapno dagus a matarimaan daytoy.
Sungbat daytoy ti kapitana iti impormasyon a dimmanon ditoy Bombo Radyo nga adda ti dakkel nga abot iti imburnal ken agamak da amangan no makaitunda daytoy ti desgrasya.
Inlawlawag na a kalpasan a naikkan ti imburnal iti paset ti barangay da ken adda ti nakita na a bassit nga abot ket kanayon na nga ibagbaga iti contractor a tarimaanen na daytoy.
Inpetteng na a mabalin a gapo iti truck nga aglabas iti nasao a paset ti barangay ket dimmakel ti abot ti imburnal.
Gapo iti daytoy, ikalikagom na a matariman ti imburnal ken no saan pay laeng nga aksyunan ti contractor ket inpasingked na a personal a kwarta na ti mausar tapno alisto a malpas gapo ta no mangala da ti pondo ti barangay ket sigurado a maibayag pay laeng ti pannakatarimaan daytoy.
