LAOAG CITY – Mamati ni Atty. Kiddz Castro, Criminal Law Professor ti Northwestern University ditoy siudad ti Laoag a dakkel ti agbalin nga epektona ti pannakatratar iti impeachment trial kontra ken ni Vice President Sara Duterte iti nasapa nga adjournment ti Senado.
Segun kenkuana, no daytoy ket matungpal ket dakkel ti posibilidadna a ti sumaro a pannakatratar iti impeachment trial ti Bise Presidente ket inton malpasen ti 2025 National and Local Elections.
Gapu iti daytoy, inlawlawagna nga adu manen ti agbalbaliw nangruna kadagiti baro a mangabak a Senador no ania ti agbalin a takderda iti pannaka-impeach ni Vice President Sara.
Kunana a ti pannakaipila ti impeachment ket maminsan laeng iti makatawen no sadinno a no saan a matalantan ti Senado ita a tawen ket masapol manen nga agbutos dagiti agpanpanday linteg manipud iti House of Representatives.
Nupay kasta, inpettengna a no saan a dagiti dati met laeng a nakatugaw ti agbutos ket dakkel ti posibilidadna a mabalbaliwan ti umuna a resulta ti butos dagiti agpanpanday linteg no sadinno a kaaduan kadagitoy ket umanamong a mapadisi ti Bise Presidente.
Maipalagip a dumanon iti 215 ti pakabuklan ti bilang dagiti nagbutos a kongresista para iti impeachment ni Vice President Sara.
Immuna iti daytoy, indauloan ni Ilocos Norte 1st District Rep. ken Presidential Son Sandro Marcos iti panagpirma iti impeachment complaint kontra iti maikadua a kangatoan nga opisial ti pagilian.
