LAOAG CITY – Inpakaammo ni Dr. Alan Taylan, Internal Medicine ti St. Camillus De Lellis Hospital a dakkel ti epektona kadagiti indibidual ti doomscrolling.
Segun kenkuana, daytoy ket babaen iti panagbasa kadagiti negatibo ken saan a napintas a komento iti online.
Inbatadna a dagiti kangrunaan a maapektaran iti daytoy ket dagiti ubbing wenno dagiti maibilang a millennial.
Kunana nga awan met iti nailanad iti panagadal a mabalin nga adda ti agtubo iti utek kas ti tumor wenno aniaman a sakit no di ket ad-adda a makapasar dagiti maseknan iti epekto ti behavior dagitoy.
Inlawlawagna a nupay matured ti maysa nga indibidual ket adda latta dagiti posible nga epektona iti salun-at dagitoy no saanda a maliklikan ti panag-doomscrolling.
Mainaig iti daytoy, kuna ni Dr. Taylan a basar iti maysa a panagsukisok nga immadu ti bilang dagiti saan unay a dumaldalan iti doomscrolling gapu ta mas pinilida a liklikan daytoy tapno makissayan dagiti negatibo nga impormasion a maaw-awatna.
Immuna iti daytoy, adda ti rimmuar a panagadal a narisgo iti utek ti doomscrolling gapu iti pannaka-expose kadagiti negatibo a damag a mabalin a pagtaudan ti “vicarious trauma,” rason a dagiti readers ken viewers ket makapasar ti secondhand trauma.
Kabayatanna, naammoan a mapaspasamak ti doomscrolling no ti tao ket agkonkonsumo ti atiddog nga oras kadagiti negatibo wenno makapa-depress nga impormasion iti online.
