LAOAG CITY – Nangisayangkat ti dance party dagiti sumagmmanao a residente iti South Korea kalpasan a na-impeach ni South Korean President Yoon Suk Yeol.
Daytoy ti inbatad ni Bombo International News Correspondent Ogin Quiena Sacoco-Jung idiay South Korea apaman ti agtultuloy nga imbestigasyon seknan iti kellaat a panangideklara ni Yoon ti martial law ngem insigida met laeng a naikkat.
Nu pay kasta, inpetteng ni Jung a dagiti dadduma ket normal laeng ti nagbalin a reaksyonda sipud ta inekspektardan nga adu dagiti agbutos a maimpeach ni Yoon.
Kunana saan pay a pimmanaw ni Yoon iti blue house iti laksid a powerless daytoyen.
Iti agdama, temporaryo nga imatmatunan ni Prime Minister Han Duck-soo ti nasao a pagilian ngem adda dagiti sayangguseng a kaonsiabo ni Yoon daytoy.
Maipalagip a namitlon a gundaway nga adda naimpeach a presidente iti South Korea.
Kabayatanna, inawagan met ti Constitutional Court ni South Korean President Yoon Suk Yeol kalpasan a saan na nga ikankano ti immuna a summon kenkuana.
Immuna a naisyuan ni President Yoon idi napan a lawas ti summon tapno tumabuno iti Seoul Central District Prosecutors Office para iti sumagmamano a saludsod seknan iti panangipatungpal na ti martial law.
