LAOAG CITY – Kalikagom da Kapitan Allen Alcid ken Kag. Gilbert Martillano a maipadanon kadagiti maseknan a kompanya ti kasasaad ti canal nga agturong Barangay Nangalisan-A ditoy ciudad ti Laoag.
Naammuan a ti Robinson’s Mall ken Venvi Construction firm, ket maipagarop a saan da ifil-filter dagiti water waste da no sadinno a no agturong daytoy iti canal iti nadakamat a barangay ket apektaranna ti salun-at dagiti residente.
Segun ken ni Kagawad Martillano, narugit ti danom, nabangsit ken agbangsit gapu ta aglum-lumot, rason no apay a kalikagomda a madalusan ken maikkan ti naan-anay nga atensyon.
Imbatad ni Barangay Kapitan Alcid nga immunan a naiyuman da daytoy iti biang ti City Planning, pakairamanan ti biang ni Konsehal Derrick Lao.
Kunana nga impasigurado met ti Konsehal nga isasar na daytoy iti sumaruno a session da.
Kabayatanna, inpetteng ni Alcid a masapol koma nga agbalin a responsible dagiti establisamento seknan iti water waste management.
