LAOAG CITY – Kinumpirmaran ni Police Chief Inspector Dexter Corpuz, Community Relations Officer iti Ilocos Norte Police Provincial Office (INPPO) nga adda dagiti naala da a maibilang a kontrabando iti Ilocos Norte Provincial Jail (INPJ) bayat ti panangiyuswat da ti oplan galugad.
Karaman ditoy ti cutter, kartib ken dadduma pay a banag a mabalin a makadangran ti maysa a tao.
Malaksid ti daytoy, adda pay ti nakita da a rungrung ti sigarilyo ken dapo isut gapu na a paeksamen da iti biang ti crime laboratory tapno maamoan no dagitoy ket maipawil a droga.
Iti eksklusibo nga interview ti Bombo Radyo Laoag ken ni Corpuz, inpetteng na a naiget a maipawil ti agsigarilyo iti uneg ti pagbaludan.
Kabayatanna, awan ti naala dagiti otoridad nga anyaman a kontrabando iti uneg ti Bureau of Jail Management and Penology iti siudad ti Laoag ken ti siudad ti Batac.
