LAOAG CITY – Manamnama a sumangpet ti dapo ti bangkay ti OFW a pimmusay idiay Saudi Arabi gapo iti covid-19, iti pagtaengan na iti paset ti iti Barangay 48-A, Cabungaan North ditoy ciudad ti Laoag.
Segun kenni Mr. Jun Vidad, ti katugangan ti pimmusay, manipud Saudi Arabia ket naiyawid idiay Metro Manila ti bangkay ken na-cremate.
Inbatad na a sabaten da iti border iti ili ti Badoc ken plano da nga imansayag kas panangrespeto iti uneg ti tallo agingga iti lima nga aldaw.
Kunana nga apaman a maala da ti dapo ket ipakaammo da a dagus iti barangay tapno alaen ti balakad ti Barangay Chairman no mano nga aldaw ti ipalubos na a pannakamansayag ti dapo ti bangkay ti manugang na.
Naamoan a gapo iti sitwasyon gubay ti covid-19 ket marigatan a sumangpet dagiti annak ti maseknan.
Mainaig iti daytoy, kunana nga urayen da no anya a tulong ti maipaay ti kompanya a nagpaayan ti manugang na idiay Saudi Arabia.
Innayon ni Vidad a nalpas metten wenno naisubmitir da aminen dagiti dokumento a masapol ti OWWA para iti pannakaproseso dagiti benipisyo ti manugang na.
Kabayatanna, inlawlawag ni Dr. Alan Taylan a natalged ti dapo ti bangkay a maimansayag.
Segun kenni Taylan, awan ti pammaneknek a makaakar iti tao ti dapo ti bangkay a na-cremate kalpasan anatay gapo iti virus.
Mainaig iti daytoy, kuna ni Taylan nga adda ti masursurot seknan iti Infection prevention and control for the safe management of a dead body in the context of COVID-19.
Inbatad na nga adda iti guidelines nga inparuk-at ti World Health Organization (WHO) seknan iti husto a pannaka-handle dagiti natay a tao gapo iti iti covid.
Kabayatanna, inlawlawag ni Taylan a no masurot ti pagaladan ken maliklikan a makaptan ti virus ket malimitaran dagiti tattao a mapan makidung-aw.
