LAOAG CITY – Napirmaan ti Memorandum of Agreement wenno MOA iti nagbaetan ti gobierno probinsial ti Ilocos Norte babaen ken ni Gob. Matthew Marcos Manotoc ken ti Department of Agrarian Reform wenno DAR babaen ken ni Regional Director Maria Ana Francisco.
Naipalaon iti nasao a katulagan ti panangipaay ti Department of Agrarian Reform ti “grant” iti gobierno probinsial ti Ilocos Norte nga agdagup ti limapulo (50) a million a pisos para iti pannakaiyestablisar ti Solar Power Irrigation System ditoy probinsia.
Inlawlawag ti regional director ti Department of Agrarian Reform a nabukel ti nasao a katulagan para iti “sustainable agriculture”.
Inpalgakna a babaen iti nasao a proyekto ket magesdan dagiti magasto dagiti mannalon a benepisiario ti “agrarian reform”.
Segun kenkuana, basar iti palawag dagiti mannalon kadagiti lugar a nakaipatungpalen ti maiyasping a proyekto, umabot iti innem a pulo a porsiento ti nainutda ti panagusarda itindakamat a sistema ti irigasion wenno panagpadanum kadagiti mulada iti kataltalonan.
Inbunannag ni Francisco a sangapulo ket maysa (11) nga ili dagiti pakaiyestablisaran ti nasao a proyekto.
Inbatadna a paset daytoy iti panangisentro ti gobernador iti programa ti gobierno probinsial iti benneg ti agrikultura.
Inlawlawagna a kadagupan dagiti naruayen a naatendaranna a Regional Development Council meeting ket ni laeng Gob. Marcos Manotoc ti nakitana a nangkasarita kadagiti amin a kameng ti konseho pakaseknan ti agrikultura, aglawlaw ken iti pannakaipasigurado a saan a maapektaran dagiti umili iti pannakaipatungpal dagiti addang para iti panagdur-as ti maysa a lugar.
Mainaig iti daytpy, mamati ti regional director ti Department of Agrarian Reform nga iti uneg ti tallo a bulan ket maipasdek ti nasao a proyekto ditoy probinsia.
Kabayatanna, mangnamnama ni Francisco nga ad-adu pay ti maipaay a tulong manipud iti Department of Agrarian Reform ditoy probinsia.
