LAOAG CITY – Saan a mangiruar ti sungbat ti direktor a ni Darryl Yap ken ti legal counsel daytoy a ni Atty. Raymond Fortun mainaig iti pannakaiyuli iti Korte ti reklamo a cyberlibel nga inpila ni Vic Sotto kontra ken ni Yap.
Basar iti kampo ni Yap, umdasen ti naiparuk-at nga impormasion ni Assistant City Prosecutor Elvin Keith Barrios ti Muntinlupa Regional Trial Court isu a saanen a kasapulan pay ti reaksion ti direktor.
Sumangsango ita ni Yap iti kaso a libel iti babaen ti Article 353 ken 355 ti Revised Penal Code a naamendaran iti relation to violation of Section 4 (C) (4) of Republic Act 10175 wenno Cybercrime Prevention Act of 2012.
Daytoy ket namunganay iti kontrobersial a teaser video ti pelikulana, ti The Rapists of Pepsi Paloma a makadadael iti reputasion ken kinatao ni Vic.
